தீவிர வெப்ப அலையால் திணறும் ஐரோப்பா மக்கள் - உலக சுகாதார அமைப்பு எச்சரிக்கை

ஐரோப்பாவில் 90 மில்லியனுக்கும் அதிகமான மக்களைப் பாதிக்கும் வெப்ப அலை பெரும் பகுதிகளில் பரவி வருகிறது.

பிரித்தானியா மற்றும் பிரான்ஸ் ஆகிய நாடுகளில் சாதனை அளவிலான வெப்பநிலை பதிவாகியுள்ள நிலையில், இந்தத் தீவிர வெப்பநிலை மக்களின் உயிருக்கு ஆபத்தை விளைவிக்கும் என உலக சுகாதார அமைப்பு எச்சரித்துள்ளது.

பிரித்தானியா வானிலை ஆய்வு மையத்தின் தரவுகளின் அடிப்படையில், காலநிலைச் சீர்குலைவால் அதிகரித்த வெப்பநிலை ஹாம்ப்ஷயரின் கோஸ்போர்ட் (Gosport) பகுதியில் 36.1 டிகிரி செல்சியஸ் (97°F) அளவை எட்டியுள்ளது. அன்று பிற்பகல், மேற்கு சசெக்ஸின் விகான்ஹோல்ட் (Wiggonholt) பகுதியில் 35.8 டிகிரி செல்சியஸ் (96°F) வெப்பநிலை பதிவானது.

இந்த நிலையில், முந்தைய நாள் பதிவான சாதனையை விட வெப்பநிலை சற்று உயர்ந்ததால், 1947-இல் வெப்பநிலை அளவீடுகள் தொடங்கப்பட்டதிலிருந்து பிரான்ஸ் தனது மிக வெப்பமான நாளைப் பதிவு செய்துள்ளது.

தேசிய வானிலை ஆய்வு மையம் வெளியிட்டுள்ள தகவலின் அடிப்படையில், பிரான்ஸ் முழுவதும் உள்ள 30 வானிலை நிலையங்களில் அளவிடப்பட்ட பகல் மற்றும் இரவு நேர அதிகபட்ச வெப்பநிலைகளின் சராசரியான அந்நாட்டின் தேசிய வெப்பக் குறியீடு, 30 டிகிரி செல்சியஸ் (86 டிகிரி பாரன்ஹீட்) என்ற புதிய உச்சத்தை எட்டியுள்ளது; இது முன்னெப்போதும் இல்லாத வகையில் பதிவாகி வரும் அதிகபட்ச வெப்பநிலை வரிசையில் மிகச் சமீபத்திய நிகழ்வாகும்.

இதற்கு முந்தைய சாதனையான 29.4 டிகிரி செல்சியஸ், ஆகஸ்ட் 2003 மற்றும் ஜூலை 2019-ஆம் ஆண்டுகளில் ஏற்பட்ட வெப்ப அலைகளின் போது பதிவானது.

பிரித்தானியாவின் முந்தைய ஜூன் மாத சாதனை அளவான 35.6 டிகிரி செல்சியஸ், 1957-ல் லண்டனின் கேம்டன் சதுக்கத்தில் பதிவானது. பின்னர், 1976-ல் சவுத்தாம்ப்டனில் இந்த அளவு மீண்டும் எட்டப்பட்டது.

பிரித்தானியாவில் இதுவரை பதிவான மிக உயர்ந்த வெப்பநிலை 40.3 டிகிரி செல்சியஸ் ஆகும். இது 19 ஜூலை 2022 அன்று லிங்கன்ஷயரில் உள்ள கோனிங்ஸ்பியில் பதிவானது.

மேற்கு ஐரோப்பாவின் பெரும்பகுதி கடும் வெப்பத்தால் தொடர்ந்து தகித்து வரும் நிலையில், அதில் பெரும்பாலானோர் பிரான்ஸ் மற்றும் ஸ்பெயினில் உள்ளவர்கள் எனவும், குறைந்தது 94 மில்லியன் மக்கள் 35 டிகிரி செல்சியஸ் அளவுக்கு அதிகமான வெப்பநிலையை அனுபவிப்பார்கள் எனவும் எதிர்பார்க்கப்படுகிறது.

ஐரோப்பா முழுவதும், 35 கோடிக்கும் அதிகமான மக்கள், அதாவது மக்கள்தொகையில் கிட்டத்தட்ட மூன்றில் இரண்டு பங்கு பேர், 30 டிகிரி செல்சியஸ்க்கும் அதிகமான வெப்பநிலையை எதிர்கொள்கின்றனர்.

ஸ்பெயினில், திங்கட்கிழமை தினசரி சராசரி வெப்பநிலை 28.08 டிகிரி செல்சியஸ் ஆகவும், செவ்வாய்க்கிழமை 28.17 டிகிரி செல்சியஸ் ஆகவும் பதிவானதாக தேசிய வானிலை ஆய்வு மையம் தெரிவித்துள்ளது.

இது ஜூன் மாதத்தில் இதுவரை பதிவானதிலேயே மிக உயர்ந்த வெப்பநிலையாகும். பிரான்சின் பிரதான நிலப்பகுதியின் மக்கள்தொகையில் நான்கில் மூன்று பங்கிற்கும் அதிகமானோர் வசிக்கும் 72 நிர்வாகப் பிரிவுகள், கடுமையான வெப்பம் காரணமாக வியாழக்கிழமை சிவப்பு எச்சரிக்கையின் கீழ் கொண்டுவரப்பட்டுள்ளது.ஜூன் 17 அன்று வெப்ப அலை தொடங்கியதிலிருந்து, நாடு முழுவதும் 50க்கும் மேற்பட்ட நிர்வாகப் பிரிவுகளில் 40 டிகிரி செல்சியஸ் அல்லது அதற்கும் அதிகமான வெப்பநிலை பதிவாகியுள்ளது.

மேலும், நாட்டின் பெரும்பாலான பகுதிகளில் கடும் வெப்பம் வார இறுதி வரையிலும் தொடரும் என்றே தேசிய வானிலை ஆய்வு மையம் தெரிவித்துள்ளது.