காசாவில் ஒவ்வொரு நாளும் சராசரியாக 28 குழந்தைகள் மரணம்

காசாவில் இஸ்ரேலின் தொடர்ச்சியான குண்டுவெடிப்புகள் மற்றும் அவசர மனிதாபிமான உதவிகளை தடை செய்யும் கட்டுப்பாடுகள் காரணமாக, ஒவ்வொரு நாளும் சராசரியாக 28 குழந்தைகள் உயிரிழப்பதாக ஐக்கிய நாடுகள் சபை (ஐ.நா.) எச்சரிக்கை விடுத்துள்ளது.

"குண்டுவெடிப்பு, ஊட்டச்சத்து குறைபாடு, பட்டினி மற்றும் அத்தியாவசிய உதவிகளின் பற்றாக்குறையால் குழந்தைகள் உயிரிழக்கின்றனர்," என்று ஐ.நா. குழந்தைகள் நிதியம் (UNICEF) செவ்வாய்க்கிழமை X தளத்தில் பதிவிட்டு, இந்த இதயத்தை உலுக்கும் நிலைமையை வெளிப்படுத்தியது.

காசாவில் ஐந்து வயதுக்குட்பட்ட அனைத்து குழந்தைகளும் ஊட்டச்சத்து குறைபாட்டின் ஆபத்தில் உள்ளதாக ஐ.நா. வலியுறுத்தியுள்ளது.

2023 அக்டோபர் 7 முதல் இஸ்ரேலின் தாக்குதல்களால் 60,933 பாலஸ்தீனியர்கள் உயிரிழந்துள்ளனர், மேலும் 150,027 பேர் காயமடைந்துள்ளனர்.

கடந்த 24 மணி நேரத்தில் மட்டும், ஒரு குழந்தை உட்பட எட்டு பாலஸ்தீனியர்கள் பட்டினியால் உயிரிழந்துள்ளனர்.

இஸ்ரேல் உதவிகளை தடுப்பதோடு, உதவி கோருவோரை தாக்குவதால், 94 குழந்தைகள் உட்பட 188 பேர் உயிரிழந்துள்ளனர்.

"உயிர் பிழைத்த குழந்தைகளுக்கு, குழந்தைப் பருவம் என்பது உணவு, தண்ணீர், மருந்து போன்ற அடிப்படை தேவைகளுக்காக தினசரி நடக்கும் கடுமையான போராட்டமாக மாறிவிட்டது," என சர்வதேச ஊடகமொன்று சுட்டிக்காட்டியுள்ளது.