Villiers-le-Bel: எலிகளின் மலக்கழிவுகள், சிறுநீர் துர்நாற்றம் போன்ற சுகாதார பிரச்சினைகள் காரணமாக Aldi மூடல்!!

Val-d’Oise மாவட்டத்தின் Villiers-le-Bel பகுதியில் அமைந்துள்ள ZAC des Tissonvilliers வளாகத்தில் செயல்பட்டு வந்த Aldi Market சூப்பர் மார்க்கெட், பொதுச்சுகாதார விதிகளை கடுமையாக மீறியதாகக் கண்டறியப்பட்டதைத் தொடர்ந்து, இன்று மாவட்ட நிர்வாக உத்தரவின் பேரில் மூடப்பட்டது. 

மாவட்ட நுகர்வோர் பாதுகாப்பு மற்றும் பொது மக்களின் பாதுகாப்பு துறை (DDPP) மேற்கொண்ட ஆய்வில், கடையின் களஞ்சியப் பகுதிகளில் எலிகளின் மலக்கழிவுகள், சிறுநீர் துர்நாற்றம் மற்றும் சீரற்ற முறையில் அடுக்கப்பட்ட பெட்டிகள் காணப்பட்டதாக தெரிவிக்கப்பட்டது.

மேலும் ஆய்வின் போது, பொருட்கள் இறக்குமதி செய்யும் பகுதிகளிலும் குளிர்சாதன அறைகளிலும் எலி தொற்று பரவலாக இருப்பது உறுதிப்படுத்தப்பட்டது. சுகாதார நடைமுறைகள் முறையாக பின்பற்றப்படவில்லை என்பதாலும், சில உணவுப் பொருட்கள் பனிக்கட்டியாக மாறியிருந்தது மூலம் குளிர்சாதன பெட்டிகளில் பழுது ஏற்பட்டிருந்ததும் அதிகாரிகளால் சுட்டிக்காட்டப்பட்டது. இதனால் நுகர்வோர் சுகாதாரத்திற்கு கடும் அபாயம் ஏற்பட வாய்ப்பு உள்ளதாக மாவட்ட நிர்வாகம் தெரிவித்துள்ளது.

இந்தச் சூழ்நிலையை கருத்தில் கொண்டு, Val-d’Oise மாவட்ட நிர்வாகம் குறித்த கடையை நிர்வாக ரீதியாக மூட உத்தரவிட்டுள்ளது. இதற்கு முன்பும், நவம்பர் 2025-இல் Argenteuil நகரிலுள்ள Aldi கடையின் சில பிரிவுகள் இதேபோன்ற காரணங்களால் மூடப்பட்டிருந்தன. அப்போது, குளிர்சாதன பெட்டிகளில் ஏற்பட்ட பழுது காரணமாக காலாவதியான 800 கிலோகிராம் உணவுப் பொருட்கள் விற்பனையிலிருந்து அகற்றப்பட்ட பின்னர், சீரமைப்பு நடவடிக்கைகள் முடிவடைந்ததையடுத்து அந்தக் கடை மீண்டும் திறக்கப்பட்டிருந்ததமை குறிப்பிடத்தக்கது.