Google Pixel 8a விலை கசிவு! இந்தியர்களுக்கு சிறந்த தேர்வாக இருக்குமா?

பட்ஜெட் விலை ஸ்மார்ட்போன் பிரியர்களுக்கு ஏற்ற Google Pixel 8a ஃபோனை ஆர்வமுடன் எதிர்பார்த்து காத்திருக்கிறீர்களா? அப்படியானால், இதோ உங்களுக்கு ஒரு சுவாரஸ்யமான செய்தி!  கூகுள் I/O 2024 ற்கு முன்பாகவே இந்த போனின் விலை கசிந்துள்ளது.

கசிந்த தகவல்களின்படி, கனடாவில் உள்ள ஒரு ரீடெய்லர், அடுத்த மாதம் நடக்கும் Google I/O 2024-ல் அறிமுகப்படுத்தப்படும் என எதிர்பார்க்கப்படும் Pixel 8a ஃபோனை முன்கூட்டியே லிஸ்ட் செய்துள்ளது.

இது நிறுவனத்தின் அதிகாரப்பூர்வ அறிவிப்புக்கு முன்பாகவே இந்த போனின் விலையை வெளிப்படுத்தி இருக்கிறது.

கசிந்த தகவலின்படி, 128GB ஸ்டோரேஜ் வேரியண்ட் CAD 708.99 (இந்திய ரூபாய் சுமார் 42,830) என்ற தொடக்க விலையில் இருக்கும் எனக் கூறப்படுகிறது.

 256GB மாடல் CAD 792.99 (இந்திய ரூபாய் சுமார் 47,900) வரை இருக்கும் என்று எதிர்பார்க்கப்படுகிறது.

 எந்த ரீடெய்லர் இந்த தகவலை வெளியிட்டது என்பது தெரியவில்லை என்றாலும், Pixel 8a  போனின் விலை வரம்பை இந்தக் கசிவு தகவல் உறுதிப்படுத்துகிறது.

இந்திய வாடிக்கையாளர்களைப் பொறுத்தவரை, முந்தைய தலைமுறை மாடலான Pixel 7a வை விட இது கொஞ்சம் அதிக விலையில் இருக்கும் என்று எதிர்பார்க்கப்படுகிறது.

 Pixel 7a  மே 2023 இல் 8GB RAM + 128GB ஸ்டோரேஜ் கொண்ட ஒரே மாடலாக ரூபாய் 43,999 க்கு அறிமுகப்படுத்தப்பட்டது.

 Pixel 8a இதுவரை அதிகாரப் பூர்வமாக அறிவிக்கப்படவில்லை என்பதையும், இவை கசிந்த தகவல்கள் மட்டுமே என்பதையும் நினைவில் கொள்ள வேண்டும்.

என்றாலும், Pixel  சீரிஸின் வழக்கமான விலை நிர்ணய உத்திக்கு இந்தக் கசிவு தகவல் ஒத்துப்போகிறது, மேலும் வாங்குவோருக்கு ஒரு யோசனை கிடைக்கிறது.

Google I/O நிகழ்வு சில வாரங்களில் நடைபெற இருப்பதால், Pixel 8a போனின் அதிகாரப்பூர்வ விவரங்கள், அம்சங்கள் மற்றும் உலகளாவிய விலை பற்றிய கூடுதல் தகவல்கள் கிடைக்கும் என்று எதிர்பார்க்கலாம்.