கோடைக்காலத்தில் சுமார் 10 லட்சம் ஊழியர்களுக்கு வழங்கப்படும் கட்டாய விடுமுறை போனஸ்!!

சுமார் ஒரு மாதத்தில், பிரான்சில் உள்ள கிட்டத்தட்ட 9.5 லட்சம் ஊழியர்கள் கட்டாய விடுமுறைப் போனஸ் (Prime de vacances) பெற உள்ளனர். இந்தப் போனஸுக்கு யார் தகுதியானவர்கள்? எவ்வளவு தொகை கிடைக்கும்? எப்போது வழங்கப்படும்? என்பதைக் கீழே பார்க்கலாம்.

யார் இந்தப் போனஸைப் பெறலாம்?

இந்தப் போனஸ் Convention collective Syntec என்ற கூட்டு தொழிலாளர் ஒப்பந்தத்தின் கீழ் பணிபுரியும் ஊழியர்களுக்குக் கட்டாயமாக வழங்கப்படுகிறது.

இந்த ஒப்பந்தம் 3,000-க்கும் மேற்பட்ட பிரெஞ்சு நிறுவனங்களை உள்ளடக்கியது. குறிப்பாக:

• தகவல் தொழில்நுட்பம் (IT) மற்றும் டிஜிட்டல் துறை
• பொறியியல்
• ஆலோசனைச் சேவைகள்
• நிகழ்ச்சி மேலாண்மை
• தொழில்முறை பயிற்சி
• ஆய்வு அலுவலகங்கள்
• கட்டிடக்கலை நிறுவனங்கள்

போன்ற துறைகளில் பணிபுரிபவர்கள் இதன் கீழ் வரலாம்.

பெற வேண்டிய ஒரே நிபந்தனை

உங்கள் நிறுவனம் Syntec ஒப்பந்தத்தின் கீழ் இருந்தால், நீங்கள் இந்தப் போனஸைப் பெற தகுதியானவர். முதலாளி இதை மறுக்க முடியாது.

நீங்கள் தகுதியானவரா என்பதை அறிய, உங்கள் சமீபத்திய சம்பளச் சீட்டில் (bulletin de salaire) குறிப்பிடப்பட்டுள்ள கூட்டு ஒப்பந்தத்தின் பெயரைச் சரிபார்க்கலாம்.

எவ்வளவு தொகை கிடைக்கும்?

இந்தப் போனஸின் தொகை நிர்ணயிக்கப்பட்ட ஒன்றல்ல; அது நிறுவனத்திற்கேற்ப மாறுபடும்.

Syntec ஒப்பந்தத்தின்படி, ஊழியர்களுக்கு வழங்கப்படும் பல்வேறு போனஸ்கள் மற்றும் ஊக்கத் தொகைகள், மொத்தமாக குறைந்தபட்சம் 10% அளவுக்கு இருந்தால், அவை விடுமுறைப் போனஸாகக் கருதப்படலாம். மேலும் அதன் ஒரு பகுதி மே 1 முதல் அக்டோபர் 31 வரை வழங்கப்பட வேண்டும்.

தொகை எவ்வாறு பகிரப்படுகிறது?

நிறுவனம் அல்லது நிறுவன ஒப்பந்தத்தின் அடிப்படையில்:

• அனைத்து ஊழியர்களுக்கும் சமமாக,
• சம்பள விகிதாச்சாரப்படி,
• சார்ந்திருக்கும் குழந்தைகள் இருந்தால் கூடுதல் தொகையுடன்,
• ஊதியத்துடன் வழங்கப்படும் விடுமுறைத் தொகையில் 10% அதிகரிப்பாக,
• அல்லது ஆண்டின் ஒரு பகுதியிலேயே பணியாற்றியவர்களுக்கு பணியாற்றிய காலத்திற்கு ஏற்ப விகிதாச்சாரப்படி

வழங்கப்படலாம்.

எப்போது வழங்கப்படும்?

Syntec ஒப்பந்தம் குறிப்பிட்ட தேதியை நிர்ணயிக்கவில்லை. ஆனால் பெரும்பாலான நிறுவனங்கள் இந்தப் போனஸை ஜூலை மாதத்தில், கோடை விடுமுறை காலத்தில் வழங்குகின்றன.

அது பொதுவாக ஜூலை மாத சம்பளத்துடன் சேர்த்து வழங்கப்பட்டு, சம்பளச் சீட்டையிலும் காட்டப்படும்.

வரி மற்றும் சமூகக் கட்டணங்கள்

இந்தப் போனஸ் சம்பளத்துடன் சேர்க்கப்படுவதால்:

• சமூகப் பாதுகாப்பு பங்களிப்புகள் (cotisations sociales) விதிக்கப்படும்.
• வருமான வரி கணக்கிலும் சேர்க்கப்படும்.

மேலும், இது ஆண்டுதோறும் வழங்கப்பட வேண்டிய தனித்துவமான போனஸ் ஆகும். எனவே:

• 13வது மாதச் சம்பளம் (13e mois)
• இலக்கு அடிப்படையிலான செயல்திறன் போனஸ்
• போன்றவை இதற்கு மாற்றாக வழங்கப்பட முடியாது.

மற்ற துறைகளிலும் உள்ளதா?

கட்டிடத் தொழில் மற்றும் பொதுப்பணித் துறைகளிலும் இதுபோன்ற கட்டாய விடுமுறைப் போனஸ் வழங்கப்படுகிறது. மற்ற துறைகளில் சில ஊழியர்களும் விடுமுறைப் போனஸ் பெறலாம். ஆனால் அது சட்டப்படி கட்டாயமல்ல; நிறுவனத்தின் விருப்பத்தையும் உள் கொள்கையையும் பொறுத்தது.