ரவி மோகன் நடிக்கும் ‘BRO CODE’ படத்தின் தலைப்பு மாற்றமா?

நடிகர் ரவி மோகன் தயாரித்து, அவரே கதாநாயகனாக நடித்துவரும் ‘ப்ரோ கோட்’ திரைப்படத்தின் தலைப்பு மாற்றப்பட உள்ளதாக தற்போது உறுதி செய்யப்பட்டுள்ளது. காரணம், அந்தப் படத்தின் அறிமுக வீடியோவில் இருந்து ‘ப்ரோ கோட்’ என்ற தலைப்பு நீக்கப்பட்டிருப்பது. மேலும் அந்த இடத்தில் தற்போது ‘புரொடக்ஷன் நம்பர் 1’ என்று குறிப்பிடப்பட்டுள்ளதாக தகவல்கள் வெளியாகியுள்ளன. விரைவில் இந்த திரைப்படத்திற்கு புதிய தலைப்பை அறிவிக்க படக்குழு திட்டமிட்டுள்ளது.

இயக்குநர் கார்த்திக் யோகி இயக்கத்தில் உருவாகி வரும் இந்த திரைப்படத்தில் ரவி மோகன், எஸ்.ஜே. சூர்யா, அர்ஜுன் அசோகன் உள்ளிட்ட பலர் முக்கிய கதாபாத்திரங்களில் நடித்துள்ளனர். நடிகர் ரவி மோகன் இந்தப் படத்தின் மூலம் தயாரிப்பாளராகவும் மாறி, தனது தயாரிப்பில் இந்த திரைப்படத்தை உருவாக்கி வந்தார்.

இந்த திரைப்படம் அறிவிக்கப்பட்ட உடனேயே ‘ப்ரோ கோட்’ என்ற தலைப்பை பயன்படுத்தக்கூடாது என்று டெல்லியைச் சேர்ந்த ஒரு மதுபான உற்பத்தி நிறுவனம் வழக்கு தொடர்ந்தது. அந்த நிறுவனத்தின் பெயருடன் இந்த தலைப்பு தொடர்பு கொண்டதாக அவர்கள் கூறியதால் இந்த விவகாரம் சட்ட ரீதியான பிரச்சினையாக மாறியது.

கடந்த பிப்ரவரி மாதத்தில் இரு தரப்பினருக்கும் இடையே சமரச ஒப்பந்தம் விரைவில் கையெழுத்தாக வாய்ப்பு இருப்பதாக சென்னை உயர்நீதிமன்றத்தில் தெரிவிக்கப்பட்டது. ஆனால் அந்த பேச்சுவார்த்தைகள் சுமூகமாக முடிவடையவில்லை என்பது தற்போது உறுதியாகியுள்ளது. இதன் காரணமாக படத்தின் அறிமுக வீடியோவிலிருந்து ‘ப்ரோ கோட்’ என்ற தலைப்பு நீக்கப்பட்டிருப்பது குறிப்பிடத்தக்கது.