புதிய கருத்துக்கணிப்பு: அரசியலில் RN கட்சியின் செல்வாக்கு அதிகரிப்பு!!

புதிய கருத்துக்கணிப்பின் படி, Rassemblement National (RN) கட்சியின் கருத்துக்களுக்கு ஆதரவு தொடர்ந்து அதிகரித்து வருகிறது. 

Verian நிறுவனம் நடத்திய இந்த ஆய்வில், 42% பிரெஞ்சு மக்கள் இந்த தீவிர வலதுசாரி கட்சியின் கருத்துகளுடன் உடன்படுவதாகத் தெரிவித்துள்ளனர். இது கடந்த ஆண்டைவிட 3 புள்ளிகள் அதிகமாகவும், 2022 முதல் 13 புள்ளிகள் உயர்வாகவும் உள்ளது. 

அதே நேரத்தில், 41% பேர் RN ஜனநாயகத்திற்கு ஆபத்தாக இருக்கிறது எனக் கருதுகின்றனர், மேலும் 44% பேர் கட்சி வெளிநாட்டினரை வெறுக்கும் கட்சியாக நினைக்கின்றனர். இருப்பினும், பெரும்பாலானோர் இந்தக் கட்சி அதிகாரத்தை அடையக்கூடும் என நம்புகின்றனர். அதே கருத்துக்கணிப்பில், RN தலைவர் ஜோர்டன் பார்டெல்லா அடுத்த ஜனாதிபதி தேர்தலில் வெற்றிபெறும் அதிக வாய்ப்புடையவர் என 49% மக்கள் கருதுகின்றனர். 

ஜனநாயகத்திற்கு ஆபத்தான அரசியல் தலைவர்களாக ஜோன்-லூக் மெலன்சான், எரிக் செம்மூர் மற்றும் எம்மானுவேல் மக்ரோன் போன்றவர்களை குறிப்பிடப்பட்டுள்ளனர். மரின் லூ பென் தொடர்பான நீதிமன்ற வழக்கில், அவர் ஒரு சாதாரண நீதிமன்ற வழக்காளரைப் போலவே நடத்தப்படுகிறார் என பாதிக்கும் மேற்பட்ட பிரெஞ்சு மக்கள் கருத்து தெரிவித்துள்ளனர்.