ஜனநாயகனும், பராசக்தியும் வசூலில் புதிய சாதனை நிகழ்த்துமா ?

பொங்கல் பண்டிகையை முன்னிட்டு ஜனநாயகன் மற்றும் பராசக்தி படங்கள் அடுத்தடுத்த நாட்களில் வெளியாகின்றன. நடிகர் விஜய்யின் கடைசி படம் என கூறப்படும் ஜனநாயகன், ஜனவரி 9 ஆம் திகதி வெளியாகிறது. சிவகார்த்திகேயனின் 25ஆவது திரைப்படமான பராசக்தி, ஜனவரி 10 இல் வெளிவருகிறது.

முதலில் 14ஆம் திகதியே வெளியீடு செய்யப்படும் என அறிவிக்கப்பட்ட நிலையில், திடீரென ஜனநாயகன் வெளியீட்டுக்கு மறுநாளை, தேர்வு செய்தது பராசக்தி தயாரிப்பு நிறுவனம். பராசக்தி முன்கூட்டியே வெளியாவதற்கு பல்வேறு காரணங்கள் இருப்பதாக கூறப்படுகிறது.

ஜனவரி 9இல் ஜனநாயகன் வெளியாகும்போது விநியோகஸ்தர்கள், திரையரங்கு உரிமையாளர்களுடன் குறைந்தது இரண்டு வார காலத்திற்கு ஒப்பந்தம் போடுவார்கள்.

அதன்படி ஜனநாயகனுக்கு 800 திரையரங்குகள் கிடைக்கப்பெற்றால், பராசக்திக்கு 250 திரையரங்குகள் கூட கிடைப்பதில் சிக்கல் ஏற்படும். இதனை தவிர்க்கவே 10ஆம் திகதியை பராசக்தி படக்குழு செய்திருப்பதாக சொல்லப்படுகிறது.

தமிழ்நாட்டில் 1164 திரையரங்குகள் இருக்கும் சூழலில், ஜனநாயகனுக்கு 550 திரையரங்குகளும், பராசக்திக்கு 500 திரையரங்குகளும் ஒதுக்கப்படும் எனக் கூறப்படுகிறது.முதல் நாளில் 700 திரையரங்குகளில் ஜனநாயகன் வெளியாகலாம் என்றும், அடுத்த நாளில் அது 550ஆக குறைக்கப்படும் எனவும் சொல்லப்படுகிறது.

இந்த பக்கம் விஜய் - அந்த பக்கம் சிவகார்த்திகேயன் என இந்திய சினிமாவில் பெரும் மார்க்கெட் உள்ள நட்சத்திரங்களின் படங்கள் அடுத்தடுத்த நாளில் வருவதால், வசூல் குறையவே செய்யும் என திரையரங்கு உரிமையாளர்கள் கூறுகின்றனர்.

இதற்காக 2023இல் துணிவும், வாரிசும் சேர்ந்து வந்ததை ஒப்பிட்டு கூறும் அவர்கள், இவை தனித்தனியாக வெளியாகி இருந்தால், இரு படங்களும் 150 கோடி ரூபாய்க்கு மேல் வசூல் செய்திருக்கும் என்கின்றனர்.

இரு படங்களுக்கும் திரையரங்குகளுக்கான ஒப்பந்தம் நடைபெற்று வந்தாலும், அந்த படங்களுக்கான தணிக்கைச் சான்றிழ்கள் இன்னும் வரவில்லை.

ஜனநாயகனை பொறுத்தவரை AU சான்றிதழ் கிடைக்கும் எனக் கூறப்படுகிறது. அதே சமயம் மொழி பிரச்சினையை பேசியிருக்கும் பராசக்திக்கு தணிக்கை சான்றிதழ் கிடைப்பதில் பிரச்சினை நிலவுகிறது.

மறு தணிக்கை குழுவுக்கு, பராசக்தியை அனுப்பியிருக்கும் படக்குழு, அவர்களின் பதிலுக்காக காத்திருக்கிறது.பல்வேறு சவால்களுக்கு மத்தியில் வெளியாகும் ஜனநாயகனும், பராசக்தியும் வசூலில் புதிய சாதனை நிகழ்த்துமா என்பது பொங்கல் விடுமுறைக்கு பின்பு தெரிந்துவிடும்.